Mei Muddaschbrooch

Quadradeschdadd Mannem

Faschd fer umme

Im Radio halbschdindlisch de selwe Ton
Minuddelang Werbung durchs Miggrofon
En Preiskniller do, en Mordsrabadd dord
Die Mehrwerdschdeier lossen se ford
Dagdäglisch wersch dodemidd konfrondierd
Unn sisdemadisch dovu infildrierd
Mansch Oogebood gild bloß fers Wocheend
Damidd ma zum Großeikaaf dordhi rennd
Dann kaafd ma dord ei, uff Deifel kumm raus
Wenns billischer is, dann nizzd ma des aus
Brauchd mas odder nedd, schbield dobei kää Roll
Haubdsach ma hodd gschbard, denn des find ma doll
Doch offd hodd ma um des Schnebbsche zu mache
Im Waage sunschd lauda deirere Sache
Die Audobosse hamms grad nedd leischd
Ihr Dreggschleidern hawwes Limmid erreischd
De Dieselskandal hodd se kald vawischd
Vorbei isses midd ihrm Engelsgsischd
Doch leischd lossen die sisch nedd unnagrigge
Die Schlaumeier schließen die Absazzligge
Die Eidauschprämie werd schnell zum Renner
Denn uff de Kobb gfalle is dord känner
Schun horschn se uff, die ganse Dumme
Des neie Audo scheind faschd fer umme
Ihr Schnebbschejeger fangd oo zu dengge
Vun denne hodd känner was zu vaschengge
Die haun des dodsischer woannerschd druff
Denn denne ihr Reschnung gehd immer uff
30.10.2017 © Kira Schmitz